Narayaniyam Dashaka 18 - Vishnu Stotrams

jātasya dhruvakula ēva tuṅgakīrtē-
raṅgasya vyajani sutaḥ sa vēnanāmā ।
yaddōṣavyathitamatiḥ sa rājavarya-
stvatpādē nihitamanā vanaṃ gatō'bhūt ॥1॥

pāpō'pi kṣititalapālanāya vēnaḥ
paurādyairupanihitaḥ kaṭhōravīryaḥ ।
sarvēbhyō nijabalamēva sampraśaṃsan
bhūchakrē tava yajanānyayaṃ nyarautsīt ॥2॥

samprāptē hitakathanāya tāpasaughē
mattō'nyō bhuvanapatirna kaśchanēti ।
tvannindāvachanaparō munīśvaraistaiḥ
śāpāgnau śalabhadaśāmanāyi vēnaḥ ॥3॥

tannāśāt khalajanabhīrukairmunīndrai-
stanmātrā chiraparirakṣitē tadaṅgē ।
tyaktāghē parimathitādathōrudaṇḍā-
ddōrdaṇḍē parimathitē tvamāvirāsīḥ ॥4॥

vikhyātaḥ pṛthuriti tāpasōpadiṣṭaiḥ
sūtādyaiḥ pariṇutabhāvibhūrivīryaḥ ।
vēnārtyā kabalitasampadaṃ dharitrī-
mākrāntāṃ nijadhanuṣā samāmakārṣīḥ ॥5॥

bhūyastāṃ nijakulamukhyavatsayuktyai-
rdēvādyaiḥ samuchitachārubhājanēṣu ।
annādīnyabhilaṣitāni yāni tāni
svachChandaṃ surabhitanūmadūduhastvam ॥6॥

ātmānaṃ yajati makhaistvayi tridhāma-
nnārabdhē śatatamavājimēdhayāgē ।
spardhāluḥ śatamakha ētya nīchavēṣō
hṛtvā'śvaṃ tava tanayāt parājitō'bhūt ॥7॥

dēvēndraṃ muhuriti vājinaṃ harantaṃ
vahnau taṃ munivaramaṇḍalē juhūṣau ।
rundhānē kamalabhavē kratōḥ samāptau
sākṣāttvaṃ madhuripumaikṣathāḥ svayaṃ svam ॥8॥

taddattaṃ varamupalabhya bhaktimēkāṃ
gaṅgāntē vihitapadaḥ kadāpi dēva ।
satrasthaṃ muninivahaṃ hitāni śaṃsa-
nnaikṣiṣṭhāḥ sanakamukhān munīn purastāt ॥9॥

vijñānaṃ sanakamukhōditaṃ dadhānaḥ
svātmānaṃ svayamagamō vanāntasēvī ।
tattādṛkpṛthuvapurīśa satvaraṃ mē
rōgaughaṃ praśamaya vātagēhavāsin ॥10॥