Narayaniyam Dashaka 20 - Vishnu Stotrams

priyavratasya priyaputrabhūtā-
dāgnīdhrarājāduditō hi nābhiḥ ।
tvāṃ dṛṣṭavāniṣṭadamiṣṭimadhyē
tavaiva tuṣṭyai kṛtayajñakarmā ॥1॥

abhiṣṭutastatra munīśvaraistvaṃ
rājñaḥ svatulyaṃ sutamarthyamānaḥ ।
svayaṃ janiṣyē'hamiti bruvāṇa-
stirōdadhā barhiṣi viśvamūrtē ॥2॥

nābhipriyāyāmatha mērudēvyāṃ
tvamaṃśatō'bhūḥ ṝṣabhābhidhānaḥ ।
alōkasāmānyaguṇaprabhāva-
prabhāvitāśēṣajanapramōdaḥ ॥3॥

tvayi trilōkībhṛti rājyabhāraṃ
nidhāya nābhiḥ saha mērudēvyā ।
tapōvanaṃ prāpya bhavanniṣēvī
gataḥ kilānandapadaṃ padaṃ tē ॥4॥

indrastvadutkarṣakṛtādamarṣā-
dvavarṣa nāsminnajanābhavarṣē ।
yadā tadā tvaṃ nijayōgaśaktyā
svavarṣamēnadvyadadhāḥ suvarṣam ॥5॥

jitēndradattāṃ kamanīṃ jayantī-
mathōdvahannātmaratāśayō'pi ।
ajījanastatra śataṃ tanūjā-
nēṣāṃ kṣitīśō bharatō'grajanmā ॥6॥

navābhavan yōgivarā navānyē
tvapālayan bhāratavarṣakhaṇḍān ।
saikā tvaśītistava śēṣaputra-
stapōbalāt bhūsurabhūyamīyuḥ ॥7॥

uktvā sutēbhyō'tha munīndramadhyē
viraktibhaktyanvitamuktimārgam ।
svayaṃ gataḥ pāramahaṃsyavṛtti-
madhā jaḍōnmattapiśāchacharyām ॥8॥

parātmabhūtō'pi parōpadēśaṃ
kurvan bhavān sarvanirasyamānaḥ ।
vikārahīnō vichachāra kṛtsnāṃ
mahīmahīnātmarasābhilīnaḥ ॥9॥

śayuvrataṃ gōmṛgakākacharyāṃ
chiraṃ charannāpya paraṃ svarūpam ।
davāhṛtāṅgaḥ kuṭakāchalē tvaṃ
tāpān mamāpākuru vātanātha ॥10॥