Narayaniyam Dashaka 67 - Vishnu Stotrams

sphuratparānandarasātmakēna tvayā samāsāditabhōgalīlāḥ ।
asīmamānandabharaṃ prapannā mahāntamāpurmadamambujākṣyaḥ ॥1॥

nilīyatē'sau mayi mayyamāyaṃ ramāpatirviśvamanōbhirāmaḥ ।
iti sma sarvāḥ kalitābhimānā nirīkṣya gōvind tirōhitō'bhūḥ ॥2॥

rādhābhidhāṃ tāvadajātagarvāmatipriyāṃ gōpavadhūṃ murārē ।
bhavānupādāya gatō vidūraṃ tayā saha svairavihārakārī ॥3॥

tirōhitē'tha tvayi jātatāpāḥ samaṃ samētāḥ kamalāyatākṣyaḥ ।
vanē vanē tvāṃ parimārgayantyō viṣādamāpurbhagavannapāram ॥4॥

hā chūta hā champaka karṇikāra hā mallikē mālati bālavalyaḥ ।
kiṃ vīkṣitō nō hṛdayaikachōraḥ ityādi tāstvatpravaṇā vilēpuḥ ॥5॥

nirīkṣitō'yaṃ sakhi paṅkajākṣaḥ purō mamētyākulamālapantī ।
tvāṃ bhāvanāchakṣuṣi vīkṣya kāchittāpaṃ sakhīnāṃ dviguṇīchakāra ॥6॥

tvadātmikāstā yamunātaṭāntē tavānuchakruḥ kila chēṣṭitāni ।
vichitya bhūyō'pi tathaiva mānāttvayā vimuktāṃ dadṛśuścha rādhām ॥7॥

tataḥ samaṃ tā vipinē samantāttamōvatārāvadhi mārgayantyaḥ ।
punarvimiśrā yamunātaṭāntē bhṛśaṃ vilēpuścha jagurguṇāṃstē ॥8॥

tathā vyathāsaṅkulamānasānāṃ vrajāṅganānāṃ karuṇaikasindhō ।
jagattrayīmōhanamōhanātmā tvaṃ prādurāsīrayi mandahāsī ॥9॥

sandigdhasandarśanamātmakāntaṃ tvāṃ vīkṣya tanvyaḥ sahasā tadānīm ।
kiṃ kiṃ na chakruḥ pramadātibhārāt sa tvaṃ gadāt pālaya mārutēśa ॥10॥