Narayaniyam Dashaka 76 - Vishnu Stotrams

gatvā sāndīpanimatha chatuṣṣaṣṭimātrairahōbhiḥ
sarvajñastvaṃ saha musalinā sarvavidyā gṛhītvā ।
putraṃ naṣṭaṃ yamanilayanādāhṛtaṃ dakṣiṇārthaṃ
datvā tasmai nijapuramagā nādayan pāñchajanyam ॥1॥

smṛtvā smṛtvā paśupasudṛśaḥ prēmabhārapraṇunnāḥ
kāruṇyēna tvamapi vivaśaḥ prāhiṇōruddhavaṃ tam ।
kiñchāmuṣmai paramasuhṛdē bhaktavaryāya tāsāṃ
bhaktyudrēkaṃ sakalabhuvanē durlabhaṃ darśayiṣyan ॥2॥

tvanmāhātmyaprathimapiśunaṃ gōkulaṃ prāpya sāyaṃ
tvadvārtābhirbahu sa ramayāmāsa nandaṃ yaśōdām ।
prātarddṛṣṭvā maṇimayarathaṃ śaṅkitāḥ paṅkajākṣyaḥ
śrutvā prāptaṃ bhavadanucharaṃ tyaktakāryāḥ samīyuḥ ॥3॥

dṛṣṭvā chainaṃ tvadupamalasadvēṣabhūṣābhirāmaṃ
smṛtvā smṛtvā tava vilasitānyuchchakaistāni tāni ।
ruddhālāpāḥ kathamapi punargadgadāṃ vāchamūchuḥ
saujanyādīn nijaparabhidāmapyalaṃ vismarantyaḥ ॥4॥

śrīmān kiṃ tvaṃ pitṛjanakṛtē prēṣitō nirdayēna
kvāsau kāntō nagarasudṛśāṃ hā harē nātha pāyāḥ ।
āślēṣāṇāmamṛtavapuṣō hanta tē chumbanānā-
munmādānāṃ kuhakavachasāṃ vismarēt kānta kā vā ॥5॥

rāsakrīḍālulitalalitaṃ viślathatkēśapāśaṃ
mandōdbhinnaśramajalakaṇaṃ lōbhanīyaṃ tvadaṅgam ।
kāruṇyābdhē sakṛdapi samāliṅgituṃ darśayēti
prēmōnmādādbhuvanamadana tvatpriyāstvāṃ vilēpuḥ ॥6॥

ēvamprāyairvivaśavachanairākulā gōpikāstā-
stvatsandēśaiḥ prakṛtimanayat sō'tha vijñānagarbhaiḥ ।
bhūyastābhirmuditamatibhistvanmayībhirvadhūbhi-
stattadvārtāsarasamanayat kānichidvāsarāṇi ॥7॥

tvatprōdgānaiḥ sahitamaniśaṃ sarvatō gēhakṛtyaṃ
tvadvārtaiva prasarati mithaḥ saiva chōtsvāpalāpāḥ ।
chēṣṭāḥ prāyastvadanukṛtayastvanmayaṃ sarvamēvaṃ
dṛṣṭvā tatra vyamuhadadhikaṃ vismayāduddhavō'yam ॥8॥

rādhāyā mē priyatamamidaṃ matpriyaivaṃ bravīti
tvaṃ kiṃ maunaṃ kalayasi sakhē māninīmatpriyēva।
ityādyēva pravadati sakhi tvatpriyō nirjanē mā-
mitthaṃvādairaramadayaṃ tvatpriyāmutpalākṣīm ॥9॥

ēṣyāmi drāganupagamanaṃ kēvalaṃ kāryabhārā-
dviślēṣē'pi smaraṇadṛḍhatāsambhavānmāstu khēdaḥ ।
brahmānandē milati nachirāt saṅgamō vā viyōga-
stulyō vaḥ syāditi tava girā sō'karōnnirvyathāstāḥ ॥10॥

ēvaṃ bhakti sakalabhuvanē nēkṣitā na śrutā vā
kiṃ śāstraughaiḥ kimiha tapasā gōpikābhyō namō'stu ।
ityānandākulamupagataṃ gōkulāduddhavaṃ taṃ
dṛṣṭvā hṛṣṭō gurupurapatē pāhi māmāmayaughāt ॥11॥