Narayaniyam Dashaka 82 - Vishnu Stotrams

pradyumnō raukmiṇēyaḥ sa khalu tava kalā śambarēṇāhṛtastaṃ
hatvā ratyā sahāptō nijapuramaharadrukmikanyāṃ cha dhanyām ।
tatputrō'thāniruddhō guṇanidhiravahadrōchanāṃ rukmipautrīṃ
tatrōdvāhē gatastvaṃ nyavadhi musalinā rukmyapi dyūtavairāt ॥1॥

bāṇasya sā balisutasya sahasrabāhō-
rmāhēśvarasya mahitā duhitā kilōṣā ।
tvatpautramēnamaniruddhamadṛṣṭapūrvaṃ
svapnē'nubhūya bhagavan virahāturā'bhūt ॥2॥

yōginyatīva kuśalā khalu chitralēkhā
tasyāḥ sakhī vilikhatī taruṇānaśēṣān ।
tatrāniruddhamuṣayā viditaṃ niśāyā-
mānēṣṭa yōgabalatō bhavatō nikētāt ॥3॥

kanyāpurē dayitayā sukhamāramantaṃ
chainaṃ kathañchana babandhuṣi śarvabandhau ।
śrīnāradōktatadudantadurantarōṣai-
stvaṃ tasya śōṇitapuraṃ yadubhirnyarundhāḥ ॥4॥

purīpālaśśailapriyaduhitṛnāthō'sya bhagavān
samaṃ bhūtavrātairyadubalamaśaṅkaṃ nirurudhē ।
mahāprāṇō bāṇō jhaṭiti yuyudhānēnayuyudhē
guhaḥ pradyumnēna tvamapi purahantrā jaghaṭiṣē ॥5॥

niruddhāśēṣāstrē mumuhuṣi tavāstrēṇa giriśē
drutā bhūtā bhītāḥ pramathakulavīrāḥ pramathitāḥ ।
parāskandt skandaḥ kusumaśarabāṇaiścha sachivaḥ
sa kumbhāṇḍō bhāṇḍaṃ navamiva balēnāśu bibhidē ॥6॥

chāpānāṃ pañchaśatyā prasabhamupagatē Chinnachāpē'tha bāṇē
vyarthē yātē samētō jvarapatiraśanairajvari tvajjvarēṇa ।
jñānī stutvā'tha datvā tava charitajuṣāṃ vijvaraṃ sa jvarō'gāt
prāyō'ntarjñānavantō'pi cha bahutamasā raudrachēṣṭā hi raudrāḥ ॥7॥

bāṇaṃ nānāyudhōgraṃ punarabhipatitaṃ darpadōṣādvitanvan
nirlūnāśēṣadōṣaṃ sapadi bubudhuṣā śaṅkarēṇōpagītaḥ ।
tadvāchā śiṣṭabāhudvitayamubhayatō nirbhayaṃ tatpriyaṃ taṃ
muktvā taddattamānō nijapuramagamaḥ sāniruddhaḥ sahōṣaḥ ॥8॥

muhustāvachChakraṃ varuṇamajayō nandaharaṇē
yamaṃ bālānītau davadahanapānē'nilasakham ।
vidhiṃ vatsastēyē giriśamiha bāṇasya samarē
vibhō viśvōtkarṣī tadayamavatārō jayati tē ॥9॥

dvijaruṣā kṛkalāsavapurdharaṃ nṛganṛpaṃ tridivālayamāpayan ।
nijajanē dvijabhaktimanuttamāmupadiśan pavanēśvar pāhi mām ॥10॥