Narayaniyam Dashaka 11 - Vishnu Stotrams

kramēṇa sargē parivardhamānē
kadāpi divyāḥ sanakādayastē ।
bhavadvilōkāya vikuṇṭhalōkaṃ
prapēdirē mārutamandirēśa ॥1॥

manōjñanaiśrēyasakānanādyai-
ranēkavāpīmaṇimandiraiścha ।
anōpamaṃ taṃ bhavatō nikētaṃ
munīśvarāḥ prāpuratītakakṣyāḥ ॥2॥

bhavaddiddṛkṣūnbhavanaṃ vivikṣūn
dvāḥsthau jayastān vijayō'pyarundhām ।
tēṣāṃ cha chittē padamāpa kōpaḥ
sarvaṃ bhavatprēraṇayaiva bhūman ॥3॥

vaikuṇṭhalōkānuchitaprachēṣṭau
kaṣṭau yuvāṃ daityagatiṃ bhajētam ।
iti praśaptau bhavadāśrayau tau
harismṛtirnō'stviti nēmatustān ॥4॥

tadētadājñāya bhavānavāptaḥ
sahaiva lakṣmyā bahirambujākṣa ।
khagēśvarāṃsārpitachārubāhu-
rānandayaṃstānabhirāmamūrtyā ॥5॥

prasādya gīrbhiḥ stuvatō munīndrā-
nananyanāthāvatha pārṣadau tau ।
saṃrambhayōgēna bhavaistribhirmā-
mupētamityāttakṛpaṃ nyagādīḥ ॥6॥

tvadīyabhṛtyāvatha kāśyapāttau
surārivīrāvuditau ditau dvau ।
sandhyāsamutpādanakaṣṭachēṣṭau
yamau cha lōkasya yamāvivānyau ॥7॥

hiraṇyapūrvaḥ kaśipuḥ kilaikaḥ
parō hiraṇyākṣa iti pratītaḥ ।
ubhau bhavannāthamaśēṣalōkaṃ
ruṣā nyarundhāṃ nijavāsanāndhau ॥8॥

tayōrhiraṇyākṣamahāsurēndrō
raṇāya dhāvannanavāptavairī ।
bhavatpriyāṃ kṣmāṃ salilē nimajya
chachāra garvādvinadan gadāvān ॥9॥

tatō jalēśāt sadṛśaṃ bhavantaṃ
niśamya babhrāma gavēṣayaṃstvām ।
bhaktaikadṛśyaḥ sa kṛpānidhē tvaṃ
nirundhi rōgān marudālayēśa ॥10।