Narayaniyam Dashaka 10 - Vishnu Stotrams

vaikuṇṭha vardhitabalō'tha bhavatprasādā-
dambhōjayōnirasṛjat kila jīvadēhān ।
sthāsnūni bhūruhamayāni tathā tiraśchāṃ
jātiṃ manuṣyanivahānapi dēvabhēdān ॥1॥

mithyāgrahāsmimatirāgavikōpabhīti-
rajñānavṛttimiti pañchavidhāṃ sa sṛṣṭvā ।
uddāmatāmasapadārthavidhānadūna -
stēnē tvadīyacharaṇasmaraṇaṃ viśuddhyai ॥2॥

tāvat sasarja manasā sanakaṃ sanandaṃ
bhūyaḥ sanātanamuniṃ cha sanatkumāram ।
tē sṛṣṭikarmaṇi tu tēna niyujyamānā-
stvatpādabhaktirasikā jagṛhurna vāṇīm ॥3॥

tāvat prakōpamuditaṃ pratirundhatō'sya
bhrūmadhyatō'jani mṛḍō bhavadēkadēśaḥ ।
nāmāni mē kuru padāni cha hā viriñchē-
tyādau rurōda kila tēna sa rudranāmā ॥4॥

ēkādaśāhvayatayā cha vibhinnarūpaṃ
rudraṃ vidhāya dayitā vanitāścha datvā ।
tāvantyadatta cha padāni bhavatpraṇunnaḥ
prāha prajāvirachanāya cha sādaraṃ tam ॥5॥

rudrābhisṛṣṭabhayadākṛtirudrasaṅgha-
sampūryamāṇabhuvanatrayabhītachētāḥ ।
mā mā prajāḥ sṛja tapaśchara maṅgalāyē-
tyāchaṣṭa taṃ kamalabhūrbhavadīritātmā ॥6॥

tasyātha sargarasikasya marīchiratri-
statrāṅigarāḥ kratumuniḥ pulahaḥ pulastyaḥ ।
aṅgādajāyata bhṛguścha vasiṣṭhadakṣau
śrīnāradaścha bhagavan bhavadaṅghridāsaḥ ॥7॥

dharmādikānabhisṛjannatha kardamaṃ cha
vāṇīṃ vidhāya vidhiraṅgajasaṅkulō'bhūt ।
tvadbōdhitaissanakadakṣamukhaistanūjai-
rudbōdhitaścha virarāma tamō vimuñchan ॥8॥

vēdān purāṇanivahānapi sarvavidyāḥ
kurvan nijānanagaṇāchchaturānanō'sau ।
putrēṣu tēṣu vinidhāya sa sargavṛddhi-
maprāpnuvaṃstava padāmbujamāśritōbhūt ॥9॥

jānannupāyamatha dēhamajō vibhajya
srīpuṃsabhāvamabhajanmanutadvadhūbhyām ।
tābhyāṃ cha mānuṣakulāni vivardhayaṃstvaṃ
gōvinda mārutapurēśa nirundhi rōgān ॥10॥