Narayaniyam Dashaka 13 - Vishnu Stotrams

hiraṇyākṣaṃ tāvadvarada bhavadanvēṣaṇaparaṃ
charantaṃ sāṃvartē payasi nijajaṅghāparimitē ।
bhavadbhaktō gatvā kapaṭapaṭudhīrnāradamuniḥ
śanairūchē nandan danujamapi nindaṃstava balam ॥1॥

sa māyāvī viṣṇurharati bhavadīyāṃ vasumatīṃ
prabhō kaṣṭaṃ kaṣṭaṃ kimidamiti tēnābhigaditaḥ ।
nadan kvāsau kvāsaviti sa muninā darśitapathō
bhavantaṃ samprāpaddharaṇidharamudyantamudakāt ॥2॥

ahō āraṇyō'yaṃ mṛga iti hasantaṃ bahutarai-
rduruktairvidhyantaṃ ditisutamavajñāya bhagavan ।
mahīṃ dṛṣṭvā daṃṣṭrāśirasi chakitāṃ svēna mahasā
payōdhāvādhāya prasabhamudayuṅkthā mṛdhavidhau ॥3॥

gadāpāṇau daityē tvamapi hi gṛhītōnnatagadō
niyuddhēna krīḍan ghaṭaghaṭaravōdghuṣṭaviyatā ।
raṇālōkautsukyānmilati surasaṅghē drutamamuṃ
nirundhyāḥ sandhyātaḥ prathamamiti dhātrā jagadiṣē ॥4॥

gadōnmardē tasmiṃstava khalu gadāyāṃ ditibhuvō
gadāghātādbhūmau jhaṭiti patitāyāmahaha! bhōḥ ।
mṛdusmērāsyastvaṃ danujakulanirmūlanachaṇaṃ
mahāchakraṃ smṛtvā karabhuvi dadhānō ruruchiṣē ॥5॥

tataḥ śūlaṃ kālapratimaruṣi daityē visṛjati
tvayi Chindatyēnat karakalitachakrapraharaṇāt ।
samāruṣṭō muṣṭyā sa khalu vitudaṃstvāṃ samatanōt
galanmāyē māyāstvayi kila jaganmōhanakarīḥ ॥6॥

bhavachchakrajyōtiṣkaṇalavanipātēna vidhutē
tatō māyāchakrē vitataghanarōṣāndhamanasam ।
gariṣṭhābhirmuṣṭiprahṛtibhirabhighnantamasuraṃ
svapādāṅguṣṭhēna śravaṇapadamūlē niravadhīḥ ॥7॥

mahākāyaḥ sō॓'yaṃ tava charaṇapātapramathitō
galadraktō vaktrādapatadṛṣibhiḥ ślāghitahatiḥ ।
tadā tvāmuddāmapramadabharavidyōtihṛdayā
munīndrāḥ sāndrābhiḥ stutibhiranuvannadhvaratanum ॥8॥

tvachi Chandō rōmasvapi kuśagaṇaśchakṣuṣi ghṛtaṃ
chaturhōtārō'ṅghrau srugapi vadanē chōdara iḍā ।
grahā jihvāyāṃ tē parapuruṣa karṇē cha chamasā
vibhō sōmō vīryaṃ varada galadēśē'pyupasadaḥ ॥9॥

munīndrairityādistavanamukharairmōditamanā
mahīyasyā mūrtyā vimalatarakīrtyā cha vilasan ।
svadhiṣṇyaṃ samprāptaḥ sukharasavihārī madhuripō
nirundhyā rōgaṃ mē sakalamapi vātālayapatē ॥10॥