Narayaniyam Dashaka 14 - Vishnu Stotrams

samanusmṛtatāvakāṅghriyugmaḥ
sa manuḥ paṅkajasambhavāṅgajanmā ।
nijamantaramantarāyahīnaṃ
charitaṃ tē kathayan sukhaṃ nināya ॥1॥

samayē khalu tatra kardamākhyō
druhiṇachChāyabhavastadīyavāchā ।
dhṛtasargarasō nisargaramyaṃ
bhagavaṃstvāmayutaṃ samāḥ siṣēvē ॥2॥

garuḍōpari kālamēghakramaṃ
vilasatkēlisarōjapāṇipadmam ।
hasitōllasitānanaṃ vibhō tvaṃ
vapurāviṣkuruṣē sma kardamāya ॥3॥

stuvatē pulakāvṛtāya tasmai
manuputrīṃ dayitāṃ navāpi putrīḥ ।
kapilaṃ cha sutaṃ svamēva paśchāt
svagatiṃ chāpyanugṛhya nirgatō'bhūḥ ॥4॥

sa manuḥ śatarūpayā mahiṣyā
guṇavatyā sutayā cha dēvahūtyā ।
bhavadīritanāradōpadiṣṭaḥ
samagāt kardamamāgatipratīkṣam ॥5॥

manunōpahṛtāṃ cha dēvahūtiṃ
taruṇīratnamavāpya kardamō'sau ।
bhavadarchananivṛtō'pi tasyāṃ
dṛḍhaśuśrūṣaṇayā dadhau prasādam ॥6॥

sa punastvadupāsanaprabhāvā-
ddayitākāmakṛtē kṛtē vimānē ।
vanitākulasaṅkulō navātmā
vyaharaddēvapathēṣu dēvahūtyā ॥7॥

śatavarṣamatha vyatītya sō'yaṃ
nava kanyāḥ samavāpya dhanyarūpāḥ ।
vanayānasamudyatō'pi kāntā-
hitakṛttvajjananōtsukō nyavātsīt ॥8॥

nijabhartṛgirā bhavanniṣēvā-
niratāyāmatha dēva dēvahūtyām ।
kapilastvamajāyathā janānāṃ
prathayiṣyan paramātmatattvavidyām ॥9॥

vanamēyuṣi kardamē prasannē
matasarvasvamupādiśan jananyai ।
kapilātmaka vāyumandirēśa
tvaritaṃ tvaṃ paripāhi māṃ gadaughāt ॥10॥