Narayaniyam Dashaka 16 - Vishnu Stotrams

dakṣō viriñchatanayō'tha manōstanūjāṃ
labdhvā prasūtimiha ṣōḍaśa chāpa kanyāḥ ।
dharmē trayōdaśa dadau pitṛṣu svadhāṃ cha
svāhāṃ havirbhuji satīṃ giriśē tvadaṃśē ॥1॥

mūrtirhi dharmagṛhiṇī suṣuvē bhavantaṃ
nārāyaṇaṃ narasakhaṃ mahitānubhāvam ।
yajjanmani pramuditāḥ kṛtatūryaghōṣāḥ
puṣpōtkarān pravavṛṣurnunuvuḥ suraughāḥ ॥2॥

daityaṃ sahasrakavachaṃ kavachaiḥ parītaṃ
sāhasravatsaratapassamarābhilavyaiḥ ।
paryāyanirmitatapassamarau bhavantau
śiṣṭaikakaṅkaṭamamuṃ nyahatāṃ salīlam ॥3॥

anvācharannupadiśannapi mōkṣadharmaṃ
tvaṃ bhrātṛmān badarikāśramamadhyavātsīḥ ।
śakrō'tha tē śamatapōbalanissahātmā
divyāṅganāparivṛtaṃ prajighāya māram ॥4॥

kāmō vasantamalayānilabandhuśālī
kāntākaṭākṣaviśikhairvikasadvilāsaiḥ ।
vidhyanmuhurmuhurakampamudīkṣya cha tvāṃ
bhīrustvayā'tha jagadē mṛduhāsabhājā ॥5॥

bhītyā'lamaṅgaja vasanta surāṅganā vō
manmānasaṃ tviha juṣadhvamiti bruvāṇaḥ ।
tvaṃ vismayēna paritaḥ stuvatāmathaiṣāṃ
prādarśayaḥ svaparichārakakātarākṣīḥ ॥6॥

sammōhanāya militā madanādayastē
tvaddāsikāparimalaiḥ kila mōhamāpuḥ ।
dattāṃ tvayā cha jagṛhustrapayaiva sarva-
svarvāsigarvaśamanīṃ punarurvaśīṃ tām ॥7॥

dṛṣṭvōrvaśīṃ tava kathāṃ cha niśamya śakraḥ
paryākulō'jani bhavanmahimāvamarśāt ।
ēvaṃ praśāntaramaṇīyatarāvatārā-
ttvattō'dhikō varada kṛṣṇatanustvamēva ॥8॥

dakṣastu dhāturatilālanayā rajō'ndhō
nātyādṛtastvayi cha kaṣṭamaśāntirāsīt ।
yēna vyarundha sa bhavattanumēva śarvaṃ
yajñē cha vairapiśunē svasutāṃ vyamānīt ॥9॥

kruddhēśamarditamakhaḥ sa tu kṛttaśīrṣō
dēvaprasāditaharādatha labdhajīvaḥ ।
tvatpūritakratuvaraḥ punarāpa śāntiṃ
sa tvaṃ praśāntikara pāhi marutpurēśa ॥10॥