Narayaniyam Dashaka 15 - Vishnu Stotrams

matiriha guṇasaktā bandhakṛttēṣvasaktā
tvamṛtakṛduparundhē bhaktiyōgastu saktim ।
mahadanugamalabhyā bhaktirēvātra sādhyā
kapilatanuriti tvaṃ dēvahūtyai nyagādīḥ ॥1॥

prakṛtimahadahaṅkārāścha mātrāścha bhūtā-
nyapi hṛdapi daśākṣī pūruṣaḥ pañchaviṃśaḥ ।
iti viditavibhāgō muchyatē'sau prakṛtyā
kapilatanuriti tvaṃ dēvahūtyai nyagādīḥ ॥2॥

prakṛtigataguṇaughairnājyatē pūruṣō'yaṃ
yadi tu sajati tasyāṃ tat guṇāstaṃ bhajēran ।
madanubhajanatattvālōchanaiḥ sā'pyapēyāt
kapilatanuriti tvaṃ dēvahūtyai nyagādīḥ ॥3॥

vimalamatirupāttairāsanādyairmadaṅgaṃ
garuḍasamadhirūḍhaṃ divyabhūṣāyudhāṅkam ।
ruchitulitatamālaṃ śīlayētānuvēlaṃ
kapilatanuriti tvaṃ dēvahūtyai nyagādīḥ ॥4॥

mama guṇagaṇalīlākarṇanaiḥ kīrtanādyai-
rmayi surasaridōghaprakhyachittānuvṛttiḥ ।
bhavati paramabhaktiḥ sā hi mṛtyōrvijētrī
kapilatanuriti tvaṃ dēvahūtyai nyagādīḥ ॥5॥

ahaha bahulahiṃsāsañchitārthaiḥ kuṭumbaṃ
pratidinamanupuṣṇan strījitō bālalālī ।
viśati hi gṛhasaktō yātanāṃ mayyabhaktaḥ
kapilatanurititvaṃ dēvahūtyai nyagādīḥ ॥6॥

yuvatijaṭharakhinnō jātabōdhō'pyakāṇḍē
prasavagalitabōdhaḥ pīḍayōllaṅghya bālyam ।
punarapi bata muhyatyēva tāruṇyakālē
kapilatanuriti tvaṃ dēvahūtyai nyagādīḥ ॥7॥

pitṛsuragaṇayājī dhārmikō yō gṛhasthaḥ
sa cha nipatati kālē dakṣiṇādhvōpagāmī ।
mayi nihitamakāmaṃ karma tūdakpathārthaṃ
kapiltanuriti tvaṃ dēvahūtyai nyagādīḥ ॥8॥

iti suviditavēdyāṃ dēva hē dēvahūtiṃ
kṛtanutimanugṛhya tvaṃ gatō yōgisaṅghaiḥ ।
vimalamatirathā'sau bhaktiyōgēna muktā
tvamapi janahitārthaṃ vartasē prāgudīchyām ॥9॥

parama kimu bahūktyā tvatpadāmbhōjabhaktiṃ
sakalabhayavinētrīṃ sarvakāmōpanētrīm ।
vadasi khalu dṛḍhaṃ tvaṃ tadvidhūyāmayān mē
gurupavanapurēśa tvayyupādhatsva bhaktim ॥10॥