Narayaniyam Dashaka 3 - Vishnu Stotrams

paṭhantō nāmāni pramadabharasindhau nipatitāḥ
smarantō rūpaṃ tē varada kathayantō guṇakathāḥ ।
charantō yē bhaktāstvayi khalu ramantē paramamū-
nahaṃ dhanyān manyē samadhigatasarvābhilaṣitān ॥1॥

gadakliṣṭaṃ kaṣṭaṃ tava charaṇasēvārasabharē'-
pyanāsaktaṃ chittaṃ bhavati bata viṣṇō kuru dayām ।
bhavatpādāmbhōjasmaraṇarasikō nāmanivahā-
nahaṃ gāyaṃ gāyaṃ kuhachana vivatsyāmi vijanē ॥2॥

kṛpā tē jātā chētkimiva na hi labhyaṃ tanubhṛtāṃ
madīyaklēśaughapraśamanadaśā nāma kiyatī ।
na kē kē lōkē'sminnaniśamayi śōkābhirahitā
bhavadbhaktā muktāḥ sukhagatimasaktā vidadhatē ॥3॥

muniprauḍhā rūḍhā jagati khalu gūḍhātmagatayō
bhavatpādāmbhōjasmaraṇavirujō nāradamukhāḥ ।
charantīśa svairaṃ satataparinirbhātaparachi -
tsadānandādvaitaprasaraparimagnāḥ kimaparam ॥4॥

bhavadbhaktiḥ sphītā bhavatu mama saiva praśamayē-
daśēṣaklēśaughaṃ na khalu hṛdi sandēhakaṇikā ।
na chēdvyāsasyōktistava cha vachanaṃ naigamavachō
bhavēnmithyā rathyāpuruṣavachanaprāyamakhilam ॥5॥

bhavadbhaktistāvat pramukhamadhurā tvat guṇarasāt
kimapyārūḍhā chēdakhilaparitāpapraśamanī ।
punaśchāntē svāntē vimalaparibōdhōdayamila-
nmahānandādvaitaṃ diśati kimataḥ prārthyamaparam ॥6॥

vidhūya klēśānmē kuru charaṇayugmaṃ dhṛtarasaṃ
bhavatkṣētraprāptau karamapi cha tē pūjanavidhau ।
bhavanmūrtyālōkē nayanamatha tē pādatulasī-
parighrāṇē ghrāṇaṃ śravaṇamapi tē chārucharitē ॥7॥

prabhūtādhivyādhiprasabhachalitē māmakahṛdi
tvadīyaṃ tadrūpaṃ paramasukhachidrūpamudiyāt ।
udañchadrōmāñchō galitabahuharṣāśrunivahō
yathā vismaryāsaṃ durupaśamapīḍāparibhavān ॥8॥

marudgēhādhīśa tvayi khalu parāñchō'pi sukhinō
bhavatsnēhī sō'haṃ subahu paritapyē cha kimidam ।
akīrtistē mā bhūdvarada gadabhāraṃ praśamayan
bhavat bhaktōttaṃsaṃ jhaṭiti kuru māṃ kaṃsadamana ॥9॥

kimuktairbhūyōbhistava hi karuṇā yāvadudiyā-
dahaṃ tāvaddēva prahitavividhārtapralapitaḥ ।
puraḥ klṛptē pādē varada tava nēṣyāmi divasā-
nyathāśakti vyaktaṃ natinutiniṣēvā virachayan ॥10॥