Narayaniyam Dashaka 4 - Vishnu Stotrams

kalyatāṃ mama kuruṣva tāvatīṃ kalyatē bhavadupāsanaṃ yayā ।
spaṣṭamaṣṭavidhayōgacharyayā puṣṭayāśu tava tuṣṭimāpnuyām ॥1॥

brahmacharyadṛḍhatādibhiryamairāplavādiniyamaiścha pāvitāḥ ।
kurmahē dṛḍhamamī sukhāsanaṃ paṅkajādyamapi vā bhavatparāḥ ॥2॥

tāramantaranuchintya santataṃ prāṇavāyumabhiyamya nirmalāḥ ।
indriyāṇi viṣayādathāpahṛtyāsmahē bhavadupāsanōnmukhāḥ ॥3॥

asphuṭē vapuṣi tē prayatnatō dhārayēma dhiṣaṇāṃ muhurmuhuḥ ।
tēna bhaktirasamantarārdratāmudvahēma bhavadaṅghrichintakā ॥4॥

visphuṭāvayavabhēdasundaraṃ tvadvapuḥ suchiraśīlanāvaśāt ।
aśramaṃ manasi chintayāmahē dhyānayōganiratāstvadāśrayāḥ ॥5॥

dhyāyatāṃ sakalamūrtimīdṛśīmunmiṣanmadhuratāhṛtātmanām ।
sāndramōdarasarūpamāntaraṃ brahma rūpamayi tē'vabhāsatē ॥6॥

tatsamāsvadanarūpiṇīṃ sthitiṃ tvatsamādhimayi viśvanāyaka ।
āśritāḥ punarataḥ parichyutāvārabhēmahi cha dhāraṇādikam ॥7॥

itthamabhyasananirbharōllasattvatparātmasukhakalpitōtsavāḥ ।
muktabhaktakulamaulitāṃ gatāḥ sañcharēma śukanāradādivat ॥8॥

tvatsamādhivijayē tu yaḥ punarmaṅkṣu mōkṣarasikaḥ kramēṇa vā ।
yōgavaśyamanilaṃ ṣaḍāśrayairunnayatyaja suṣumnayā śanaiḥ ॥9॥

liṅgadēhamapi santyajannathō līyatē tvayi parē nirāgrahaḥ ।
ūrdhvalōkakutukī tu mūrdhataḥ sārdhamēva karaṇairnirīyatē ॥10॥

agnivāsaravalarkṣapakṣagairuttarāyaṇajuṣā cha daivataiḥ ।
prāpitō ravipadaṃ bhavatparō mōdavān dhruvapadāntamīyatē ॥11॥

āsthitō'tha maharālayē yadā śēṣavaktradahanōṣmaṇārdyatē ।
īyatē bhavadupāśrayastadā vēdhasaḥ padamataḥ puraiva vā ॥12॥

tatra vā tava padē'thavā vasan prākṛtapralaya ēti muktatām ।
svēchChayā khalu purā vimuchyatē saṃvibhidya jagadaṇḍamōjasā ॥13॥

tasya cha kṣitipayōmahō'niladyōmahatprakṛtisaptakāvṛtīḥ ।
tattadātmakatayā viśan sukhī yāti tē padamanāvṛtaṃ vibhō ॥14॥

archirādigatimīdṛśīṃ vrajan vichyutiṃ na bhajatē jagatpatē ।
sachchidātmaka bhavat guṇōdayānuchcharantamanilēśa pāhi mām ॥15॥