Narayaniyam Dashaka 42 - Vishnu Stotrams

kadāpi janmarkṣadinē tava prabhō nimantritajñātivadhūmahīsurā ।
mahānasastvāṃ savidhē nidhāya sā mahānasādau vavṛtē vrajēśvarī ॥1॥

tatō bhavattrāṇaniyuktabālakaprabhītisaṅkrandanasaṅkulāravaiḥ ।
vimiśramaśrāvi bhavatsamīpataḥ parisphuṭaddāruchaṭachchaṭāravaḥ ॥2॥

tatastadākarṇanasambhramaśramaprakampivakṣōjabharā vrajāṅganāḥ ।
bhavantamantardadṛśussamantatō viniṣpataddāruṇadārumadhyagam ॥3॥

śiśōrahō kiṃ kimabhūditi drutaṃ pradhāvya nandaḥ paśupāścha bhūsurāḥ ।
bhavantamālōkya yaśōdayā dhṛtaṃ samāśvasannaśrujalārdralōchanāḥ ॥4॥

kaskō nu kautaskuta ēṣa vismayō viśaṅkaṭaṃ yachChakaṭaṃ vipāṭitam ।
na kāraṇaṃ kiñchidihēti tē sthitāḥ svanāsikādattakarāstvadīkṣakāḥ ॥5॥

kumārakasyāsya payōdharārthinaḥ prarōdanē lōlapadāmbujāhatam ।
mayā mayā dṛṣṭamanō viparyagāditīśa tē pālakabālakā jaguḥ ॥6॥

bhiyā tadā kiñchidajānatāmidaṃ kumārakāṇāmatidurghaṭaṃ vachaḥ ।
bhavatprabhāvāvidurairitīritaṃ manāgivāśaṅkyata dṛṣṭapūtanaiḥ ॥7॥

pravālatāmraṃ kimidaṃ padaṃ kṣataṃ sarōjaramyau nu karau virōjitau।
iti prasarpatkaruṇātaraṅgitāstvadaṅgamāpaspṛśuraṅganājanāḥ ॥8॥

ayē sutaṃ dēhi jagatpatēḥ kṛpātaraṅgapātātparipātamadya mē ।
iti sma saṅgṛhya pitā tvadaṅgakaṃ muhurmuhuḥ śliṣyati jātakaṇṭakaḥ ॥9॥

anōnilīnaḥ kila hantumāgataḥ surārirēvaṃ bhavatā vihiṃsitaḥ ।
rajō'pi nō dṛṣṭamamuṣya tatkathaṃ sa śuddhasattvē tvayi līnavān dhruvam ॥10॥

prapūjitaistatra tatō dvijātibhirviśēṣatō lambhitamaṅgalāśiṣaḥ ।
vrajaṃ nijairbālyarasairvimōhayan marutpurādhīśa rujāṃ jahīhi mē ॥11॥