Narayaniyam Dashaka 43 - Vishnu Stotrams

tvāmēkadā gurumarutpuranātha vōḍhuṃ
gāḍhādhirūḍhagarimāṇamapārayantī ।
mātā nidhāya śayanē kimidaṃ batēti
dhyāyantyachēṣṭata gṛhēṣu niviṣṭaśaṅkā ॥1॥

tāvadvidūramupakarṇitaghōraghōṣa-
vyājṛmbhipāṃsupaṭalīparipūritāśaḥ ।
vātyāvapussa kila daityavarastṛṇāva-
rtākhyō jahāra janamānasahāriṇaṃ tvām ॥2॥

uddāmapāṃsutimirāhatadṛṣṭipātē
draṣṭuṃ kimapyakuśalē paśupālalōkē ।
hā bālakasya kimiti tvadupāntamāptā
mātā bhavantamavilōkya bhṛśaṃ rurōda ॥3॥

tāvat sa dānavavarō'pi cha dīnamūrti-
rbhāvatkabhāraparidhāraṇalūnavēgaḥ ।
saṅkōchamāpa tadanu kṣatapāṃsughōṣē
ghōṣē vyatāyata bhavajjananīninādaḥ ॥4॥

rōdōpakarṇanavaśādupagamya gēhaṃ
krandatsu nandamukhagōpakulēṣu dīnaḥ ।
tvāṃ dānavastvakhilamuktikaraṃ mumukṣu-
stvayyapramuñchati papāta viyatpradēśāt ॥5॥

rōdākulāstadanu gōpagaṇā bahiṣṭha-
pāṣāṇapṛṣṭhabhuvi dēhamatisthaviṣṭham ।
praikṣanta hanta nipatantamamuṣya vakṣa-
syakṣīṇamēva cha bhavantamalaṃ hasantam ॥6॥

grāvaprapātaparipiṣṭagariṣṭhadēha-
bhraṣṭāsuduṣṭadanujōpari dhṛṣṭahāsam ।
āghnānamambujakarēṇa bhavantamētya
gōpā dadhurgirivarādiva nīlaratnam ॥7॥

ēkaikamāśu parigṛhya nikāmananda-
nnandādigōpaparirabdhavichumbitāṅgam ।
ādātukāmapariśaṅkitagōpanārī-
hastāmbujaprapatitaṃ praṇumō bhavantam ॥8॥

bhūyō'pi kinnu kṛṇumaḥ praṇatārtihārī
gōvinda ēva paripālayatāt sutaṃ naḥ ।
ityādi mātarapitṛpramukhaistadānīṃ
samprārthitastvadavanāya vibhō tvamēva ॥9॥

vātātmakaṃ danujamēvamayi pradhūnvan
vātōdbhavān mama gadān kimu nō dhunōṣi ।
kiṃ vā karōmi punarapyanilālayēśa
niśśēṣarōgaśamanaṃ muhurarthayē tvām ॥10॥