Narayaniyam Dashaka 6 - Vishnu Stotrams

ēvaṃ chaturdaśajaganmayatāṃ gatasya
pātālamīśa tava pādatalaṃ vadanti ।
pādōrdhvadēśamapi dēva rasātalaṃ tē
gulphadvayaṃ khalu mahātalamadbhutātman ॥1॥

jaṅghē talātalamathō sutalaṃ cha jānū
kiñchōrubhāgayugalaṃ vitalātalē dvē ।
kṣōṇītalaṃ jaghanamambaramaṅga nābhi-
rvakṣaścha śakranilayastava chakrapāṇē ॥2॥

grīvā mahastava mukhaṃ cha janastapastu
phālaṃ śirastava samastamayasya satyam ।
ēvaṃ jaganmayatanō jagadāśritaira-
pyanyairnibaddhavapuṣē bhagavannamastē ॥3॥

tvadbrahmarandhrapadamīśvara viśvakanda
Chandāṃsi kēśava ghanāstava kēśapāśāḥ ।
ullāsichilliyugalaṃ druhiṇasya gēhaṃ
pakṣmāṇi rātridivasau savitā cha nētrai ॥4॥

niśśēṣaviśvarachanā cha kaṭākṣamōkṣaḥ
karṇau diśō'śviyugalaṃ tava nāsikē dvē ।
lōbhatrapē cha bhagavannadharōttarōṣṭhau
tārāgaṇāścha daśanāḥ śamanaścha daṃṣṭrā ॥5॥

māyā vilāsahasitaṃ śvasitaṃ samīrō
jihvā jalaṃ vachanamīśa śakuntapaṅktiḥ ।
siddhādayaḥ svaragaṇā mukharandhramagni-
rdēvā bhujāḥ stanayugaṃ tava dharmadēvaḥ ॥6॥

pṛṣṭhaṃ tvadharma iha dēva manaḥ sudhāṃśu -
ravyaktamēva hṛdayambujamambujākṣa ।
kukṣiḥ samudranivahā vasanaṃ tu sandhyē
śēphaḥ prajāpatirasau vṛṣaṇau cha mitraḥ ॥7॥

śrōṇīsthalaṃ mṛgagaṇāḥ padayōrnakhāstē
hastyuṣṭrasaindhavamukhā gamanaṃ tu kālaḥ ।
viprādivarṇabhavanaṃ vadanābjabāhu-
chārūruyugmacharaṇaṃ karuṇāmbudhē tē ॥8॥

saṃsārachakramayi chakradhara kriyāstē
vīryaṃ mahāsuragaṇō'sthikulāni śailāḥ ।
nāḍyassaritsamudayastaravaścha rōma
jīyādidaṃ vapuranirvachanīyamīśa ॥9॥

īdṛgjaganmayavapustava karmabhājāṃ
karmāvasānasamayē smaraṇīyamāhuḥ ।
tasyāntarātmavapuṣē vimalātmanē tē
vātālayādhipa namō'stu nirundhi rōgān ॥10॥