Narayaniyam Dashaka 5 - Vishnu Stotrams

vyaktāvyaktamidaṃ na kiñchidabhavatprākprākṛtaprakṣayē
māyāyāṃ guṇasāmyaruddhavikṛtau tvayyāgatāyāṃ layam ।
nō mṛtyuścha tadā'mṛtaṃ cha samabhūnnāhnō na rātrēḥ sthiti-
statraikastvamaśiṣyathāḥ kila parānandaprakāśātmanā ॥1॥

kālaḥ karma guṇāścha jīvanivahā viśvaṃ cha kāryaṃ vibhō
chillīlāratimēyuṣi tvayi tadā nirlīnatāmāyayuḥ ।
tēṣāṃ naiva vadantyasattvamayi bhōḥ śaktyātmanā tiṣṭhatāṃ
nō chēt kiṃ gaganaprasūnasadṛśāṃ bhūyō bhavētsambhavaḥ ॥2॥

ēvaṃ cha dviparārdhakālavigatāvīkṣāṃ sisṛkṣātmikāṃ
bibhrāṇē tvayi chukṣubhē tribhuvanībhāvāya māyā svayam ।
māyātaḥ khalu kālaśaktirakhilādṛṣṭaṃ svabhāvō'pi cha
prādurbhūya guṇānvikāsya vidadhustasyāssahāyakriyām ॥3॥

māyāsannihitō'praviṣṭavapuṣā sākṣīti gītō bhavān
bhēdaistāṃ pratibimbatō viviśivān jīvō'pi naivāparaḥ ।
kālādipratibōdhitā'tha bhavatā sañchōditā cha svayaṃ
māyā sā khalu buddhitattvamasṛjadyō'sau mahānuchyatē ॥4॥

tatrāsau triguṇātmakō'pi cha mahān sattvapradhānaḥ svayaṃ
jīvē'smin khalu nirvikalpamahamityudbōdhaniṣpādkaḥ ।
chakrē'smin savikalpabōdhakamahantattvaṃ mahān khalvasau
sampuṣṭaṃ triguṇaistamō'tibahulaṃ viṣṇō bhavatprēraṇāt ॥5॥

sō'haṃ cha triguṇakramāt trividhatāmāsādya vaikārikō
bhūyastaijasatāmasāviti bhavannādyēna sattvātmanā
dēvānindriyamāninō'kṛta diśāvātārkapāśyaśvinō
vahnīndrāchyutamitrakān vidhuvidhiśrīrudraśārīrakān ॥6॥

bhūman mānasabuddhyahaṅkṛtimilachchittākhyavṛttyanvitaṃ
tachchāntaḥkaraṇaṃ vibhō tava balāt sattvāṃśa ēvāsṛjat ।
jātastaijasatō daśēndriyagaṇastattāmasāṃśātpuna-
stanmātraṃ nabhasō marutpurapatē śabdō'jani tvadbalāt ॥7॥

śbdādvyōma tataḥ sasarjitha vibhō sparśaṃ tatō mārutaṃ
tasmādrūpamatō mahō'tha cha rasaṃ tōyaṃ cha gandhaṃ mahīm ।
ēvaṃ mādhava pūrvapūrvakalanādādyādyadharmānvitaṃ
bhūtagrāmamimaṃ tvamēva bhagavan prākāśayastāmasāt ॥8॥

ētē bhūtagaṇāstathēndriyagaṇā dēvāścha jātāḥ pṛthaṅ-
nō śēkurbhuvanāṇḍanirmitividhau dēvairamībhistadā ।
tvaṃ nānāvidhasūktibhirnutaguṇastattvānyamūnyāviśaṃ-
śchēṣṭāśaktimudīrya tāni ghaṭayan hairaṇyamaṇḍaṃ vyadhāḥ ॥9॥

aṇḍaṃ tatkhalu pūrvasṛṣṭasalilē'tiṣṭhat sahasraṃ samāḥ
nirbhindannakṛthāśchaturdaśajagadrūpaṃ virāḍāhvayam ।
sāhasraiḥ karapādamūrdhanivahairniśśēṣajīvātmakō
nirbhātō'si marutpurādhipa sa māṃ trāyasva sarvāmayāt ॥10॥