Narayaniyam Dashaka 62 - Vishnu Stotrams

kadāchidgōpālān vihitamakhasambhāravibhavān
nirīkṣya tvaṃ śaurē maghavamadamuddhvaṃsitumanāḥ ।
vijānannapyētān vinayamṛdu nandādipaśupā-
napṛchChaḥ kō vā'yaṃ janaka bhavatāmudyama iti ॥1॥

babhāṣē nandastvāṃ suta nanu vidhēyō maghavatō
makhō varṣē varṣē sukhayati sa varṣēṇa pṛthivīm ।
nṛṇāṃ varṣāyattaṃ nikhilamupajīvyaṃ mahitalē
viśēṣādasmākaṃ tṛṇasalilajīvā hi paśavaḥ ॥2॥

iti śrutvā vāchaṃ piturayi bhavānāha sarasaṃ
dhigētannō satyaṃ maghavajanitā vṛṣṭiriti yat ।
adṛṣṭaṃ jīvānāṃ sṛjati khalu vṛṣṭiṃ samuchitāṃ
mahāraṇyē vṛkṣāḥ kimiva balimindrāya dadatē ॥3॥

idaṃ tāvat satyaṃ yadiha paśavō naḥ kuladhanaṃ
tadājīvyāyāsau balirachalabhartrē samuchitaḥ ।
surēbhyō'pyutkṛṣṭā nanu dharaṇidēvāḥ kṣititalē
tatastē'pyārādhyā iti jagaditha tvaṃ nijajanān ॥4॥

bhavadvāchaṃ śrutvā bahumatiyutāstē'pi paśupāḥ
dvijēndrānarchantō balimadaduruchchaiḥ kṣitibhṛtē ।
vyadhuḥ prādakṣiṇyaṃ subhṛśamanamannādarayutā-
stvamādaśśailātmā balimakhilamābhīrapurataḥ ॥5॥

avōchaśchaivaṃ tān kimiha vitathaṃ mē nigaditaṃ
girīndrō nanvēṣa svabalimupabhuṅktē svavapuṣā ।
ayaṃ gōtrō gōtradviṣi cha kupitē rakṣitumalaṃ
samastānityuktā jahṛṣurakhilā gōkulajuṣaḥ ॥6॥

pariprītā yātāḥ khalu bhavadupētā vrajajuṣō
vrajaṃ yāvattāvannijamakhavibhaṅgaṃ niśamayan ।
bhavantaṃ jānannapyadhikarajasā''krāntahṛdayō
na sēhē dēvēndrastvaduparachitātmōnnatirapi ॥7॥

manuṣyatvaṃ yātō madhubhidapi dēvēṣvavinayaṃ
vidhattē chēnnaṣṭastridaśasadasāṃ kō'pi mahimā ।
tataścha dhvaṃsiṣyē paśupahatakasya śriyamiti
pravṛttastvāṃ jētuṃ sa kila maghavā durmadanidhiḥ ॥8॥

tvadāvāsaṃ hantuṃ pralayajaladānambarabhuvi
prahiṇvan bibhrāṇa; kuliśamayamabhrēbhagamanaḥ ।
pratasthē'nyairantardahanamarudādyaiviṃhasitō
bhavanmāyā naiva tribhuvanapatē mōhayati kam ॥9॥

surēndraḥ kruddhaśchēt dvijakaruṇayā śailakṛpayā'-
pyanātaṅkō'smākaṃ niyata iti viśvāsya paśupān ।
ahō kinnāyātō giribhiditi sañchintya nivasan
marudgēhādhīśa praṇuda muravairin mama gadān ॥10॥