Narayaniyam Dashaka 63 - Vishnu Stotrams

dadṛśirē kila tatkṣaṇamakṣata-
stanitajṛmbhitakampitadiktaṭāḥ ।
suṣamayā bhavadaṅgatulāṃ gatā
vrajapadōpari vāridharāstvayā ॥1॥

vipulakarakamiśraistōyadhārānipātai-
rdiśidiśi paśupānāṃ maṇḍalē daṇḍyamānē ।
kupitaharikṛtānnaḥ pāhi pāhīti tēṣāṃ
vachanamajita śrṛṇvan mā bibhītētyabhāṇīḥ ॥2॥

kula iha khalu gōtrō daivataṃ gōtraśatrō-
rvihatimiha sa rundhyāt kō nu vaḥ saṃśayō'smin ।
iti sahasitavādī dēva gōvarddhanādriṃ
tvaritamudamumūlō mūlatō bāladōrbhyām ॥3॥

tadanu girivarasya prōddhṛtasyāsya tāvat
sikatilamṛdudēśē dūratō vāritāpē ।
parikaraparimiśrān dhēnugōpānadhastā-
dupanidadhadadhatthā hastapadmēna śailam ॥4॥

bhavati vidhṛtaśailē bālikābhirvayasyai-
rapi vihitavilāsaṃ kēlilāpādilōlē ।
savidhamilitadhēnūrēkahastēna kaṇḍū-
yati sati paśupālāstōṣamaiṣanta sarvē ॥5॥

atimahān girirēṣa tu vāmakē
karasarōruhi taṃ dharatē chiram ।
kimidamadbhutamadribalaṃ nviti
tvadavalōkibhirākathi gōpakaiḥ ॥6॥

ahaha dhārṣṭyamamuṣya vaṭōrgiriṃ
vyathitabāhurasāvavarōpayēt ।
iti haristvayi baddhavigarhaṇō
divasasaptakamugramavarṣayat ॥7॥

achalati tvayi dēva padāt padaṃ
galitasarvajalē cha ghanōtkarē ।
apahṛtē marutā marutāṃ pati-
stvadabhiśaṅkitadhīḥ samupādravat ॥8॥

śamamupēyuṣi varṣabharē tadā
paśupadhēnukulē cha vinirgatē ।
bhuvi vibhō samupāhitabhūdharaḥ
pramuditaiḥ paśupaiḥ parirēbhiṣē ॥9॥

dharaṇimēva purā dhṛtavānasi
kṣitidharōddharaṇē tava kaḥ śramaḥ ।
iti nutastridaśaiḥ kamalāpatē
gurupurālaya pālaya māṃ gadāt ॥10॥