Narayaniyam Dashaka 80 - Vishnu Stotrams

satrājitastvamatha lubdhavadarkalabdhaṃ
divyaṃ syamantakamaṇiṃ bhagavannayāchīḥ ।
tatkāraṇaṃ bahuvidhaṃ mama bhāti nūnaṃ
tasyātmajāṃ tvayi ratāṃ Chalatō vivōḍhum ॥1॥

adattaṃ taṃ tubhyaṃ maṇivaramanēnālpamanasā
prasēnastadbhrātā galabhuvi vahan prāpa mṛgayām ।
ahannēnaṃ siṃhō maṇimahasi māṃsabhramavaśāt
kapīndrastaṃ hatvā maṇimapi cha bālāya dadivān ॥2॥

śaśaṃsuḥ satrājidgiramanu janāstvāṃ maṇiharaṃ
janānāṃ pīyūṣaṃ bhavati guṇināṃ dōṣakaṇikā ।
tataḥ sarvajñō'pi svajanasahitō mārgaṇaparaḥ
prasēnaṃ taṃ dṛṣṭvā harimapi gatō'bhūḥ kapiguhām ॥3॥

bhavantamavitarkayannativayāḥ svayaṃ jāmbavān
mukundaśaraṇaṃ hi māṃ ka iha rōddhumityālapan ।
vibhō raghupatē harē jaya jayētyalaṃ muṣṭibhi-
śchiraṃ tava samarchanaṃ vyadhita bhaktachūḍāmaṇiḥ ॥4॥

budhvā'tha tēna dattāṃ navaramaṇīṃ varamaṇiṃ cha parigṛhṇan ।
anugṛhṇannamumāgāḥ sapadi cha satrājitē maṇiṃ prādāḥ ॥5॥

tadanu sa khalu brīlālōlō vilōlavilōchanāṃ
duhitaramahō dhīmān bhāmāṃ giraiva parārpitām ।
adita maṇinā tubhyaṃ labhyaṃ samētya bhavānapi
pramuditamanāstasyaivādānmaṇiṃ gahanāśayaḥ ॥6॥

vrīlākulāṃ ramayati tvayi satyabhāmāṃ
kauntēyadāhakathayātha kurūn prayātē ।
hī gāndinēyakṛtavarmagirā nipātya
satrājitaṃ śatadhanurmaṇimājahāra ॥7॥

śōkāt kurūnupagatāmavalōkya kāntāṃ
hatvā drutaṃ śatadhanuṃ samaharṣayastām ।
ratnē saśaṅka iva maithilagēhamētya
rāmō gadāṃ samaśiśikṣata dhārtarāṣṭram ॥8॥

akrūra ēṣa bhagavan bhavadichChayaiva
satrājitaḥ kucharitasya yuyōja hiṃsām ।
akrūratō maṇimanāhṛtavān punastvaṃ
tasyaiva bhūtimupadhātumiti bruvanti ॥9॥

bhaktastvayi sthirataraḥ sa hi gāndinēya-
stasyaiva kāpathamatiḥ kathamīśa jātā ।
vijñānavān praśamavānahamityudīrṇaṃ
garvaṃ dhruvaṃ śamayituṃ bhavatā kṛtaiva ॥10॥

yātaṃ bhayēna kṛtavarmayutaṃ punasta-
māhūya tadvinihitaṃ cha maṇiṃ prakāśya ।
tatraiva suvratadharē vinidhāya tuṣyan
bhāmākuchāntaśayanaḥ pavanēśa pāyāḥ ॥11॥