Narayaniyam Dashaka 47 - Vishnu Stotrams

ēkadā dadhivimāthakāriṇīṃ mātaraṃ samupasēdivān bhavān ।
stanyalōlupatayā nivārayannaṅkamētya papivān payōdharau ॥1॥

ardhapītakuchakuḍmalē tvayi snigdhahāsamadhurānanāmbujē ।
dugdhamīśa dahanē parisrutaṃ dhartumāśu jananī jagāma tē ॥2॥

sāmipītarasabhaṅgasaṅgatakrōdhabhāraparibhūtachētasā।
manthadaṇḍamupagṛhya pāṭitaṃ hanta dēva dadhibhājanaṃ tvayā ॥3॥

uchchaladdhvanitamuchchakaistadā sanniśamya jananī samādrutā ।
tvadyaśōvisaravaddadarśa sā sadya ēva dadhi vistṛtaṃ kṣitau ॥4॥

vēdamārgaparimārgitaṃ ruṣā tvamavīkṣya parimārgayantyasau ।
sandadarśa sukṛtinyulūkhalē dīyamānanavanītamōtavē ॥5॥

tvāṃ pragṛhya bata bhītibhāvanābhāsurānanasarōjamāśu sā ।
rōṣarūṣitamukhī sakhīpurō bandhanāya raśanāmupādadē ॥6॥

bandhumichChati yamēva sajjanastaṃ bhavantamayi bandhumichChatī ।
sā niyujya raśanāguṇān bahūn dvyaṅgulōnamakhilaṃ kilaikṣata ॥7॥

vismitōtsmitasakhījanēkṣitāṃ svinnasannavapuṣaṃ nirīkṣya tām ।
nityamuktavapurapyahō harē bandhamēva kṛpayā'nvamanyathāḥ ॥8॥

sthīyatāṃ chiramulūkhalē khalētyāgatā bhavanamēva sā yadā।
prāgulūkhalabilāntarē tadā sarpirarpitamadannavāsthithāḥ ॥9॥

yadyapāśasugamō vibhō bhavān saṃyataḥ kimu sapāśayā'nayā ।
ēvamādi divijairabhiṣṭutō vātanātha paripāhi māṃ gadāt ॥10॥