Narayaniyam Dashaka 98 - Vishnu Stotrams

yasminnētadvibhātaṃ yata idamabhavadyēna chēdaṃ ya ēta-
dyō'smāduttīrṇarūpaḥ khalu sakalamidaṃ bhāsitaṃ yasya bhāsā ।
yō vāchāṃ dūradūrē punarapi manasāṃ yasya dēvā munīndrāḥ
nō vidyustattvarūpaṃ kimu punaraparē kṛṣṇa tasmai namastē ॥1॥

janmāthō karma nāma sphuṭamiha guṇadōṣādikaṃ vā na yasmin
lōkānāmūtayē yaḥ svayamanubhajatē tāni māyānusārī ।
vibhrachChaktīrarūpō'pi cha bahutararūpō'vabhātyadbhutātmā
tasmai kaivalyadhāmnē pararasaparipūrṇāya viṣṇō namastē ॥2॥

nō tiryañchanna martyaṃ na cha suramasuraṃ na striyaṃ nō pummāṃsaṃ
na dravyaṃ karma jātiṃ guṇamapi sadasadvāpi tē rūpamāhuḥ ।
śiṣṭaṃ yat syānniṣēdhē sati nigamaśatairlakṣaṇāvṛttitastat
kṛchChrēṇāvēdyamānaṃ paramasukhamayaṃ bhāti tasmai namastē ॥3॥

māyāyāṃ bimbitastvaṃ sṛjasi mahadahaṅkāratanmātrabhēdai-
rbhūtagrāmēndriyādyairapi sakalajagatsvapnasaṅkalpakalpam ।
bhūyaḥ saṃhṛtya sarvaṃ kamaṭha iva padānyātmanā kālaśaktyā
gambhīrē jāyamānē tamasi vitimirō bhāsi tasmai namastē ॥4॥

śabdabrahmēti karmētyaṇuriti bhagavan kāla ityālapanti
tvāmēkaṃ viśvahētuṃ sakalamayatayā sarvathā kalpyamānam ।
vēdāntairyattu gītaṃ puruṣaparachidātmābhidhaṃ tattu tattvaṃ
prēkṣāmātrēṇa mūlaprakṛtivikṛtikṛt kṛṣṇa tasmai namastē ॥5॥

sattvēnāsattayā vā na cha khalu sadasattvēna nirvāchyarūpā
dhattē yāsāvavidyā guṇaphaṇimativadviśvadṛśyāvabhāsam ।
vidyātvaṃ saiva yātā śrutivachanalavairyatkṛpāsyandalābhē
saṃsārāraṇyasadyastruṭanaparaśutāmēti tasmai namastē ॥6॥

bhūṣāsu svarṇavadvā jagati ghaṭaśarāvādikē mṛttikāva-
ttattvē sañchintyamānē sphurati tadadhunāpyadvitīyaṃ vapustē ।
svapnadraṣṭuḥ prabōdhē timiralayavidhau jīrṇarajjōścha yadva-
dvidyālābhē tathaiva sphuṭamapi vikasēt kṛṣṇa tasmai namastē ॥7॥

yadbhītyōdēti sūryō dahati cha dahanō vāti vāyustathānyē
yadbhītāḥ padmajādyāḥ punaruchitabalīnāharantē'nukālam ।
yēnaivārōpitāḥ prāṅnijapadamapi tē chyāvitāraścha paśchāt
tasmai viśvaṃ niyantrē vayamapi bhavatē kṛṣṇa kurmaḥ praṇāmam ॥8॥

trailōkyaṃ bhāvayantaṃ triguṇamayamidaṃ tryakṣarasyaikavāchyaṃ
trīśānāmaikyarūpaṃ tribhirapi nigamairgīyamānasvarūpam ।
tisrōvasthā vidantaṃ triyugajanijuṣaṃ trikramākrāntaviśvaṃ
traikālyē bhēdahīnaṃ tribhirahamaniśaṃ yōgabhēdairbhajē tvām ॥9॥

satyaṃ śuddhaṃ vibuddhaṃ jayati tava vapurnityamuktaṃ nirīhaṃ
nirdvandvaṃ nirvikāraṃ nikhilaguṇagaṇavyañjanādhārabhūtam ।
nirmūlaṃ nirmalaṃ tanniravadhimahimōllāsi nirlīnamanta-
rnissaṅgānāṃ munīnāṃ nirupamaparamānandasāndraprakāśam ॥10॥

durvāraṃ dvādaśāraṃ triśataparimilatṣaṣṭiparvābhivītaṃ
sambhrāmyat krūravēgaṃ kṣaṇamanu jagadāchChidya sandhāvamānam ।
chakraṃ tē kālarūpaṃ vyathayatu na tu māṃ tvatpadaikāvalambaṃ
viṣṇō kāruṇyasindhō pavanapurapatē pāhi sarvāmayaughāt ॥11॥