Sri Madhvacharya Kruta Dwadasha Stotra - 10 - Vishnu Stotrams

atha daśamastōtram

ava naḥ śrīpatirapratiradhikēśādibhavādē ।
karuṇāpūrṇavarapradacharitaṃ jñāpaya mē tē ॥ 1॥

suravandyādhipa sadvarabharitāśēṣaguṇālam ।
karuṇāpūrṇavarapradacharitaṃ jñāpaya mē tē ॥ 2॥

sakaladhvāntavināśana (vināśaka) paramānandasudhāhō ।
karuṇāpūrṇavarapradacharitaṃ jñāpaya mē tē ॥ 3॥

trijagatpōta sadārchitacharaṇāśāpatidhātō ।
karuṇāpūrṇavarapradacharitaṃ jñāpaya mē tē ॥ 4॥

triguṇātītavidhāraka paritō dēhi subhaktim ।
karuṇāpūrṇavarapradacharitaṃ jñāpaya mē tē ॥ 5॥

śaraṇaṃ kāraṇabhāvana bhava mē tāta sadā'lam ।
karuṇāpūrṇavarapradacharitaṃ jñāpaya mē tē ॥ 6॥

maraṇaprāṇada pālaka jagadīśāva subhaktim ।
karuṇāpūrṇavarapradacharitaṃ jñāpaya mē tē ॥ 7॥

taruṇādityasavarṇakacharaṇābjāmala kīrtē ।
karuṇāpūrṇavarapradacharitaṃ jñāpaya mē tē ॥ 8॥

salilaprōtthasarāgakamaṇivarṇōchchanakhādē ।
karuṇāpūrṇavarapradacharitaṃ jñāpaya mē tē ॥ 9॥

kaja (khaja) tūṇīnibhapāvanavarajaṅghāmitaśaktē ।
karuṇāpūrṇavarapradacharitaṃ jñāpaya mē tē ॥ 10॥

ibahastaprabhaśōbhanaparamōrustharamāḻē ।
karuṇāpūrṇavarapradacharitaṃ jñāpaya mē tē ॥ 11॥

asanōtphullasupuṣpakasamavarṇāvaraṇāntē ।
karuṇāpūrṇavarapradacharitaṃ jñāpaya mē tē ॥ 12॥

śatamōdōdbhavasundarivarapadmōtthitanābhē ।
karuṇāpūrṇavarapradacharitaṃ jñāpaya mē tē ॥ 13॥

jagadāgūhakapallavasamakukṣē śaraṇādē ।
karuṇāpūrṇavarapradacharitaṃ jñāpaya mē tē ॥ 14॥

jagadambāmalasundarigṛhavakṣōvara yōgin ।
karuṇāpūrṇavarapradacharitaṃ jñāpaya mē tē ॥ 15॥

ditijāntaprada chakradharagadāyugvarabāhō ।
karuṇāpūrṇavarapradacharitaṃ jñāpaya mē tē ॥ 16॥

paramajñānamahānidhivadana śrīramaṇēndō ।
karuṇāpūrṇavarapradacharitaṃ jñāpaya mē tē ॥ 17॥

nikhilāghaughavināśana (vināśaka) parasaukhyapradadṛṣṭē ।
karuṇāpūrṇavarapradacharitaṃ jñāpaya mē tē ॥ 18॥

paramānandasutīrthasumunirājō harigāthām ।
kṛtavānnityasupūrṇakaparamānandapadaiṣin ॥ 19॥

iti śrīmadānandatīrthabhagavatpādāchārya virachitaṃ
dvādaśastōtrēṣu daśamastōtraṃ sampūrṇam