Narayaniyam Dashaka 26 - Vishnu Stotrams

indradyumnaḥ pāṇḍyakhaṇḍādhirāja-
stvadbhaktātmā chandanādrau kadāchit ।
tvat sēvāyāṃ magnadhīrālulōkē
naivāgastyaṃ prāptamātithyakāmam ॥1॥

kumbhōdbhūtiḥ sambhṛtakrōdhabhāraḥ
stabdhātmā tvaṃ hastibhūyaṃ bhajēti ।
śaptvā'thainaṃ pratyagāt sō'pi lēbhē
hastīndratvaṃ tvatsmṛtivyaktidhanyam ॥2॥

dagdhāmbhōdhērmadhyabhāji trikūṭē
krīḍañChailē yūthapō'yaṃ vaśābhiḥ ।
sarvān jantūnatyavartiṣṭa śaktyā
tvadbhaktānāṃ kutra nōtkarṣalābhaḥ ॥3॥

svēna sthēmnā divyadēśatvaśaktyā
sō'yaṃ khēdānaprajānan kadāchit ।
śailaprāntē gharmatāntaḥ sarasyāṃ
yūthaissārdhaṃ tvatpraṇunnō'bhirēmē ॥4॥

hūhūstāvaddēvalasyāpi śāpāt
grāhībhūtastajjalē bartamānaḥ ।
jagrāhainaṃ hastinaṃ pādadēśē
śāntyarthaṃ hi śrāntidō'si svakānām ॥5॥

tvatsēvāyā vaibhavāt durnirōdhaṃ
yudhyantaṃ taṃ vatsarāṇāṃ sahasram ।
prāptē kālē tvatpadaikāgryasidhyai
nakrākrāntaṃ hastivaryaṃ vyadhāstvam ॥6॥

ārtivyaktaprāktanajñānabhaktiḥ
śuṇḍōtkṣiptaiḥ puṇḍarīkaiḥ samarchan ।
pūrvābhyastaṃ nirviśēṣātmaniṣṭhaṃ
stōtraṃ śrēṣṭhaṃ sō'nvagādīt parātman ॥7॥

śrutvā stōtraṃ nirguṇasthaṃ samastaṃ
brahmēśādyairnāhamityaprayātē ।
sarvātmā tvaṃ bhūrikāruṇyavēgāt
tārkṣyārūḍhaḥ prēkṣitō'bhūḥ purastāt ॥8॥

hastīndraṃ taṃ hastapadmēna dhṛtvā
chakrēṇa tvaṃ nakravaryaṃ vyadārīḥ ।
gandharvē'smin muktaśāpē sa hastī
tvatsārūpyaṃ prāpya dēdīpyatē sma ॥9॥

ētadvṛttaṃ tvāṃ cha māṃ cha pragē yō
gāyētsō'yaṃ bhūyasē śrēyasē syāt ।
ityuktvainaṃ tēna sārdhaṃ gatastvaṃ
dhiṣṇyaṃ viṣṇō pāhi vātālayēśa ॥10॥