Narayaniyam Dashaka 46 - Vishnu Stotrams

ayi dēva purā kila tvayi svayamuttānaśayē stanandhayē ।
parijṛmbhaṇatō vyapāvṛtē vadanē viśvamachaṣṭa vallavī ॥1॥

punarapyatha bālakaiḥ samaṃ tvayi līlāniratē jagatpatē ।
phalasañchayavañchanakrudhā tava mṛdbhōjanamūchurarbhakāḥ ॥2॥

ayi tē pralayāvadhau vibhō kṣititōyādisamastabhakṣiṇaḥ ।
mṛdupāśanatō rujā bhavēditi bhītā jananī chukōpa sā ॥3॥

ayi durvinayātmaka tvayā kimu mṛtsā bata vatsa bhakṣitā ।
iti mātṛgiraṃ chiraṃ vibhō vitathāṃ tvaṃ pratijajñiṣē hasan ॥4॥

ayi tē sakalairviniśchitē vimatiśchēdvadanaṃ vidāryatām ।
iti mātṛvibhartsitō mukhaṃ vikasatpadmanibhaṃ vyadārayaḥ ॥5॥

api mṛllavadarśanōtsukāṃ jananīṃ tāṃ bahu tarpayanniva ।
pṛthivīṃ nikhilāṃ na kēvalaṃ bhuvanānyapyakhilānyadīdṛśaḥ ॥6॥

kuhachidvanamambudhiḥ kvachit kvachidabhraṃ kuhachidrasātalam ।
manujā danujāḥ kvachit surā dadṛśē kiṃ na tadā tvadānanē ॥7॥

kalaśāmbudhiśāyinaṃ punaḥ paravaikuṇṭhapadādhivāsinam ।
svapuraścha nijārbhakātmakaṃ katidhā tvāṃ na dadarśa sā mukhē ॥8॥

vikasadbhuvanē mukhōdarē nanu bhūyō'pi tathāvidhānanaḥ ।
anayā sphuṭamīkṣitō bhavānanavasthāṃ jagatāṃ batātanōt ॥9॥

dhṛtatattvadhiyaṃ tadā kṣaṇaṃ jananīṃ tāṃ praṇayēna mōhayan ।
stanamamba diśētyupāsajan bhagavannadbhutabāla pāhi mām ॥10॥