Narayaniyam Dashaka 55 - Vishnu Stotrams

atha vāriṇi ghōrataraṃ phaṇinaṃ
prativārayituṃ kṛtadhīrbhagavan ।
drutamāritha tīraganīpataruṃ
viṣamārutaśōṣitaparṇachayam ॥1॥

adhiruhya padāmburuhēṇa cha taṃ
navapallavatulyamanōjñaruchā ।
hradavāriṇi dūrataraṃ nyapataḥ
parighūrṇitaghōrataraṅggaṇē ॥2॥

bhuvanatrayabhārabhṛtō bhavatō
gurubhāravikampivijṛmbhijalā ।
parimajjayati sma dhanuśśatakaṃ
taṭinī jhaṭiti sphuṭaghōṣavatī ॥3॥

atha dikṣu vidikṣu parikṣubhita-
bhramitōdaravārininādabharaiḥ ।
udakādudagāduragādhipati-
stvadupāntamaśāntaruṣā'ndhamanāḥ ॥4॥

phaṇaśṛṅgasahasravinissṛmara-
jvaladagnikaṇōgraviṣāmbudharam ।
purataḥ phaṇinaṃ samalōkayathā
bahuśṛṅgiṇamañjanaśailamiva ॥5॥

jvaladakṣi parikṣaradugraviṣa-
śvasanōṣmabharaḥ sa mahābhujagaḥ ।
paridaśya bhavantamanantabalaṃ
samavēṣṭayadasphuṭachēṣṭamahō ॥6॥

avilōkya bhavantamathākulitē
taṭagāmini bālakadhēnugaṇē ।
vrajagēhatalē'pyanimittaśataṃ
samudīkṣya gatā yamunāṃ paśupāḥ ॥7॥

akhilēṣu vibhō bhavadīya daśā-
mavalōkya jihāsuṣu jīvabharam ।
phaṇibandhanamāśu vimuchya javā-
dudagamyata hāsajuṣā bhavatā ॥8॥

adhiruhya tataḥ phaṇirājaphaṇān
nanṛtē bhavatā mṛdupādaruchā ।
kalaśiñjitanūpuramañjumila-
tkarakaṅkaṇasaṅkulasaṅkvaṇitam ॥9॥

jahṛṣuḥ paśupāstutuṣurmunayō
vavṛṣuḥ kusumāni surēndragaṇāḥ ।
tvayi nṛtyati mārutagēhapatē
paripāhi sa māṃ tvamadāntagadāt ॥10॥