Narayaniyam Dashaka 54 - Vishnu Stotrams

tvatsēvōtkassaubharirnāma pūrvaṃ
kālindyantardvādaśābdaṃ tapasyan ।
mīnavrātē snēhavān bhōgalōlē
tārkṣyaṃ sākṣādaikṣatāgrē kadāchit ॥1॥

tvadvāhaṃ taṃ sakṣudhaṃ tṛkṣasūnuṃ
mīnaṃ kañchijjakṣataṃ lakṣayan saḥ ।
taptaśchittē śaptavānatra chēttvaṃ
jantūn bhōktā jīvitaṃ chāpi mōktā ॥2॥

tasmin kālē kāliyaḥ kṣvēladarpāt
sarpārātēḥ kalpitaṃ bhāgamaśnan ।
tēna krōdhāttvatpadāmbhōjabhājā
pakṣakṣiptastaddurāpaṃ payō'gāt ॥3॥

ghōrē tasmin sūrajānīravāsē
tīrē vṛkṣā vikṣatāḥ kṣvēlavēgāt ।
pakṣivrātāḥ pēturabhrē patantaḥ
kāruṇyārdraṃ tvanmanastēna jātam ॥4॥

kālē tasminnēkadā sīrapāṇiṃ
muktvā yātē yāmunaṃ kānanāntam ।
tvayyuddāmagrīṣmabhīṣmōṣmataptā
gōgōpālā vyāpiban kṣvēlatōyam ॥5॥

naśyajjīvān vichyutān kṣmātalē tān
viśvān paśyannachyuta tvaṃ dayārdraḥ ।
prāpyōpāntaṃ jīvayāmāsitha drāk
pīyūṣāmbhōvarṣibhiḥ śrīkaṭakṣaiḥ ॥6॥

kiṃ kiṃ jātō harṣavarṣātirēkaḥ
sarvāṅgēṣvityutthitā gōpasaṅghāḥ ।
dṛṣṭvā'grē tvāṃ tvatkṛtaṃ tadvidanta-
stvāmāliṅgan dṛṣṭanānāprabhāvāḥ ॥7॥

gāvaśchaivaṃ labdhajīvāḥ kṣaṇēna
sphītānandāstvāṃ cha dṛṣṭvā purastāt ।
drāgāvavruḥ sarvatō harṣabāṣpaṃ
vyāmuñchantyō mandamudyanninādāḥ ॥8॥

rōmāñchō'yaṃ sarvatō naḥ śarīrē
bhūyasyantaḥ kāchidānandamūrChā ।
āścharyō'yaṃ kṣvēlavēgō mukundē-
tyuktō gōpairnanditō vanditō'bhūḥ ॥9॥

ēvaṃ bhaktān muktajīvānapi tvaṃ
mugdhāpāṅgairastarōgāṃstanōṣi ।
tādṛgbhūtasphītakāruṇyabhūmā
rōgāt pāyā vāyugēhādhivāsa ॥10॥