Narayaniyam Dashaka 57 - Vishnu Stotrams

rāmasakhaḥ kvāpi dinē kāmada bhagavan gatō bhavān vipinam ।
sūnubhirapi gōpānāṃ dhēnubhirabhisaṃvṛtō lasadvēṣaḥ ॥1॥

sandarśayan balāya svairaṃ vṛndāvanaśriyaṃ vimalām ।
kāṇḍīraiḥ saha bālairbhāṇḍīrakamāgamō vaṭaṃ krīḍan ॥2॥

tāvattāvakanidhanaspṛhayālurgōpamūrtiradayāluḥ ।
daityaḥ pralambanāmā pralambabāhuṃ bhavantamāpēdē ॥3॥

jānannapyavijānanniva tēna samaṃ nibaddhasauhārdaḥ ।
vaṭanikaṭē paṭupaśupavyābaddhaṃ dvandvayuddhamārabdhāḥ ॥4॥

gōpān vibhajya tanvan saṅghaṃ balabhadrakaṃ bhavatkamapi ।
tvadbalabhīruṃ daityaṃ tvadbalagatamanvamanyathā bhagavan ॥5॥

kalpitavijētṛvahanē samarē parayūthagaṃ svadayitataram ।
śrīdāmānamadhatthāḥ parājitō bhaktadāsatāṃ prathayan ॥6॥

ēvaṃ bahuṣu vibhūman bālēṣu vahatsu vāhyamānēṣu ।
rāmavijitaḥ pralambō jahāra taṃ dūratō bhavadbhītyā ॥7॥

tvaddūraṃ gamayantaṃ taṃ dṛṣṭvā halini vihitagarimabharē ।
daityaḥ svarūpamāgādyadrūpāt sa hi balō'pi chakitō'bhūt ॥8॥

uchchatayā daityatanōstvanmukhamālōkya dūratō rāmaḥ ।
vigatabhayō dṛḍhamuṣṭyā bhṛśaduṣṭaṃ sapadi piṣṭavānēnam ॥9॥

hatvā dānavavīraṃ prāptaṃ balamāliliṅgitha prēmṇā ।
tāvanmilatōryuvayōḥ śirasi kṛtā puṣpavṛṣṭiramaragaṇaiḥ ॥10॥

ālambō bhuvanānāṃ prālambaṃ nidhanamēvamārachayan ।
kālaṃ vihāya sadyō lōlambaruchē harē harēḥ klēśān ॥11॥